Pakistan latest updates, breaking news, news in urdu

بلوچستان: پاک فوج کا ہیلی کاپٹر گر کر تباہ، دو میجر سمیت 6 اہلکار شہید

42
Spread the love

راولپنڈی: بلوچستان میں پاک فوج کا ہیلی کاپٹر گر کر تباہ، ہیلی کاپٹر حادثے میں دو میجر سمیت 6 جوان شہید ہوگئے۔

پاک فوج کے شعبہ تعلقات عامہ ،آئی ایس پی آر کے مطابق خوست ہرنائی میں آرمی ہیلی کاپٹر گرنے سے دو پائلٹس سمیت 6 فوجی شہید ہوئے ،شہید ہونیوالوں فوجیوںمیں دو میجر بھی شامل تھے۔

شہید ہونیوالے 30 سالہ میجر محمد منیب کا تعلق راولپنڈی ، 39 سالہ شہید میجر خرم شہزاد کا تعلق اٹک سے ہے،44 سال کے صوبیدارعبدالواحد کا تعلق کرک سے ہے، سپاہی محمد عمران کا تعلق خانیوال، نائیک جلیل کا تعلق کھاریاں، سپاہی شعیب کا تعلق جنڈ اٹک سے ہے، پاک آرمی ایوی ایشن کا ہیلی کاپٹر فلائنگ مشن پر تھا۔

وزیر اعظم شہباز شریف اور وزیراعلیٰ پنجاب چودھری پرویز الٰہی نے بلوچستان میں پاک فوج کے ہیلی کاپٹر حادثے پر اظہار افسوس کرتے ہوئے کہا کہ پوری قوم غمزدہ خاندانوں کے دکھ میں شریک ہے۔وزیراعظم شہباز شریف نے اپنے ٹویٹر پیغام میں کہا کہ ہرنائی بلوچستان میں پاک فوج کے ہیلی کاپٹر کے حادثے میں 2 پائلٹس سمیت 6 فوجی اہلکاروں کی شہادت پر دل شدید دکھی اور رنجیدہ ہے۔ اللہ تعالی سے دعا ہے کہ وہ شہداء کو جنت الفردوس میں جگہ عطا فرمائے اور ان کے لواحقین کو صبر جمیل دے۔ پوری قوم غمزدہ خاندانوں کے دکھ میں شریک ہے۔

دوسری جانب وزیراعلیٰ پنجاب چودھری پرویز الٰہی نے بھی ہیلی کاپٹر حادثے میں شہید فوجی اہلکاروں کو خراج عقیدت پیش کرتے ہوئے کہا کہ شہداء کے اہل خانہ سے دلی ہمدردی ہے، شہداء نے اپنی زندگیاں فرض کی ادائیگی پر قربان کیں، انہوں نے کہا کہ شہید ہونے والے فوجی افسران قوم کے ہیرو ہیں، قوم شہید فوجی افسروں کو سلام پیش کرتی ہے،ان کی عظیم قربانی کو کبھی فراموش نہیں کرسکتے۔