صدر مملکت نے فیصل مسجد میں خواتین کی نماز پر پابندی کا نوٹس لے لیا
صدر مملکت ڈاکٹر عارف علوی نے وفاقی دارالحکومت اسلام آباد کی فیصل مسجد میں خواتین کی نماز پر پابندی کا نوٹس لے لیا۔
صدر مملکت کا کہنا ہے کہ دنیا بھرکی مساجد میں مناسب اسلامی لباس اور سر ڈھانپ کر خواتین کونمازپڑھنے کی اجازت ہے لیکن فیصل مسجد کے مرکزی ہال میں خواتین کیلئے نماز کی علیحدہ جگہ نہیں ہے، نہ داخلے کی اجازت ہے۔
ان کا کہنا تھاکہ ضعیف اوربیمار خواتین کو لفٹ نہ ہونے کی وجہ سے دشواری کا سامنا کرنا پڑتا ہے لہٰذا میری رائے میں خواتین کو مرکزی ہال میں مخصوص جگہ پرنماز ادا کرنےکی اجازت ہونی چاہیے۔کیپیٹل ڈویلپمنٹ اتھارٹی نے ایوان صدر کو رپورٹ ارسال کی ہے جس میں کہا ہے کہ صورتحال کی بہتری کیلئے اقدامات شروع کیے ہیں، دعوۃ اکیڈمی کی پالیسی کے تحت صرف ایک گیلری خواتین کیلئے مختص ہے لیکن مرکزی ہال میں خواتین کو داخلے کی اجازت نہیں۔
صدر مملکت نے ہدایت کی کہ فیصل مسجد کے منتظم ان مسائل پر مزید وضاحت کریں۔
