بین المذاہب کانفرنس ،ڈبلیو ایم اے واشنگٹن میں بین المذاہب کانفرنس میں عالمی رہنماؤں کو مدعو کرے گا

واشنگٹن :ورلڈ مینارٹیز الائنس (ڈبلیو ایم اے) کے چیئرمین ڈیوڈ سالک نے بدھ کے روز واشنگٹن ڈی سی میں منعقد ہونے والی بین الاقوامی بین المذاہب کانفرنس کے انتظامات کو حتمی شکل دینے کے لیے ایک میٹنگ کے بعد مختلف خطوں سے عالمی رہنماؤں کو مدعو کرنے کا فیصلہ کیا ہے۔

اجلاس ڈیوڈ سالک نے ڈبلیو ایم اے کے سرپرست اعلیٰ محمد سعید فیصل کےہمراہ طلب کیا تھا، اجلاس میں بین الاقوامی کانفرنس کے انتظامات، مجوزہ مقام، مہمانوں اور دن کے بارے میں تبادلہ خیال کیا گیا۔اس موقع پر سالک نے کہا کہ پاکستان کی سابق اسپیکر قومی اسمبلی گوہر ایوب، سابق امریکی اسپیکر ہاؤس آف ریپریزنٹیٹوز نینسی پیلوسی، چیئرمین ون مین کمیشن برائے اقلیتی حقوق ڈاکٹر شعیب سڈل اور دیگر کو کانفرنس میں شرکت کی دعوت دی جائے گی۔ کانفرنس میں اقوام متحدہ کے سیکرٹری جنرل کے خصوصی نمائندے، اراکین کانگریس اور دیگر کو بطور مہمان خصوصی مدعو کیا جائے گا۔

انہوں نے بتایا کہ کانفرنس مارچ کے پہلے ہفتے میں منعقد کی جائے گی جس میں لنکن میموریل سے مارٹن لوتھر کنگ جونیئر میموریل تک ایک نمائشی رتھ سواری ہوگی۔ نمائش کو ایک منفرد اور یادگار تجربہ بنانے کے لیے مارکس سالک کی آئل پینٹنگز کو لے کر تقریباً 25 خاندان سوار ہوں گے۔سالک نے یہ بھی بتایا کہ عالمی رہنماؤں کی مارکس سالک کی پینٹنگز کی نمائش کانفرنس کا خاص حصہ ہو گی جس کا انعقاد پنڈال میں ایک منفرد انداز میں کیا جائے گا۔

انہوں نے کہا کہ یہ کانفرنس ایک منفرد فورم ہو گا جس میں مختلف مذاہب سے تعلق رکھنے والے رہنماؤں اور شخصیات کو بلایا جائے گا جس میں اسلامو فوبیا، نفرت انگیز تقاریر، قرآن پاک کی بے حرمتی، دنیا کے مختلف حصوں میں اقلیتوں کے خلاف تشدد کے بڑھتے ہوئے مسائل پر تبادلہ خیال کیا جائے گا اور ان مسائل کا موثر حل تلاش کیا جائے گا۔